Kathmandu
नेपाली कांग्रेसले निर्वाचनको परिणामपछि मात्र प्रधानमन्त्रीको उमेदवार टुंगो लगाउने भएको छ ।
एमालेले आगामी प्रधानमन्त्रीका रूपमा अध्यक्ष केपी शर्मा ओलीलाई अघि सारेको छ । कांग्रेसमा भने रामचन्द्र पौडेल, शेखर कोइराला,
शशांक कोइराला, गगन थापासहितका नेताहरूले आगामी निर्वाचनपछि प्रधानमन्त्री बन्ने आकांक्षा देखाइरहेका छन् । कांग्रेसले प्रधानमन्त्रीको उमेदवारका रूपमा कसैलाई अघि सारेको छैन ।
सोमबार कांग्रेसले गरेको पत्रकार सम्मेलन प्रवक्ता डा. प्रकाशशरण महतलाई सञ्चारकर्मीले कांग्रेसबाट आगामी प्रधानमन्त्रीबारे प्रश्न गरेका थिए ।
जवाफमा महतले प्रधानमन्त्रीको टुंगो निर्वाचनपछि गठन हुने संसदीय दलपछि लाग्ने बताए । अहिले कांग्रेसमा बोल्न छुट भएकाले नेताहरूले आफूलाई नेताहरूले आगामी प्रधानमन्त्रीको उमेदवारका रूपमा प्रस्तुत गरिरहेको उनको भनाइ छ ।
“हाम्रो पार्टीमा बोल्ने अधिकार छ । त्यही भएर बोलेको हो । पहिला निर्वाचन जाऔँ । जितेर संसद् पुगौँ र संसदीय दलको नेता बने भइहाल्यो । त्यसपछि प्रधानमन्त्री खोज्ने हो । अहिले समय आएको छैन । अहिले ९१ सिटमा सबै जित्ने र गठबन्धन जिताउन लागौँ । त्यसपछि प्रधानमन्त्रीतिर लागौँला,” उनले भने ।
उनले आगामी चुनावपछि कांग्रेसकै नेतृत्वमा सरकार बन्ने पनि बताए । “पार्टी सभापति संसदीय दलको नेता हुनुहुन्छ । उहाँको नेतृत्वमा चुनाव लडौँ । कांग्रेसकै नेतृत्वमा सरकार बन्छ,” महतले भने ।
अर्थात् महतले पार्टी सभापति शेरबहादुर देउवा नै आगामी प्रधानमन्त्रीको उमेदवार बन्नेतर्फ संकेत गरे । हुन पनि कांग्रेसमा अहिलेको अवस्थामा देउवाले नचाहेसम्म दोस्रो व्यक्ति प्रधानमन्त्री बन्न नसक्ने देखिन्छ ।
बाह्खरीकाे सहयाेगमा ।
प्रकाशित मिति २०७९ कार्तिक ८ गते मङ्गलबार ०८:४५
