काठमाडौं। एमाले पार्टी परित्याग गरेका नेकपा एमालेका स्थायी कमिटी सदस्य घनश्याम भुसालले स्वतन्त्र उम्मेदवारी दिने तयारी गरेका छन् ।
एमाले अध्यक्ष केपी शर्मा ओलीले भुसालको टिकट खोसेपछि सत्तारुढ गठबन्धनको सहयोगमा भुसाल रुपन्देही १ बाटा स्वतन्त्र उम्मेदवार बन्न लागेका हुन् ।
भुसालको उम्मेदवारी साँझसम्म टुंगो लाग्ने बताइएको छ । २०७४ को निर्वाचनमा रुपन्देही ३ बाट भुसाल उम्मेदवार बनेका थिए भने यसपालीको निर्वाचनमा रुपन्देही १ र ३ बाट भुसालको नाम सिफारिस भएको थियो । तर, दुवै क्षेत्रमा उनको नाम काटेर एमाले अरु नै उम्मेदवार छानेको छ ।
नेकपा (एकीकृत समाजवादी)ले आगामी मङ्सिर ४ गते हुने निर्वाचनमा प्रतिनिधिसभाका लागि प्रत्यक्षतर्फका उम्मेदवारको नाम टुङ्गो लगाएको छ ।
गठबन्धनका तर्फबाट एक सय ६५ निर्वाचन क्षेत्रमध्ये १९ सिट प्राप्त गरेको सो पार्टीले सबै उम्मेदवारको नाम टुङ्गो लगाएको महासचिव डा वेदुराम भुसालले जानकारी दिए। पार्टी अध्यक्ष माधवकुमार नेपाल रौतहट क्षेत्र नं १ बाट र नेता झलनाथ खनाल इलाम क्षेत्र नं १ बाट उम्मेदवार बनेका छन्। उपाध्यक्ष तथा बागमती प्रदेशका मुख्यमन्त्री राजेन्द्र पाण्डे धादिङ क्षेत्र नं १, पार्टी उपमहासचिव एवं प्रचार विभाग प्रमुख जगन्नाथ खतिवडा उदयपुर क्षेत्र नं २ र किसान श्रेष्ठ बारा क्षेत्र नं ४ बाट उम्मेदवारका रुपमा सिफारिस भएका छन्।
त्यसैगरी जीवनराम श्रेष्ठ काठमाडौँ क्षेत्र नं ८, कृष्णलाल महर्जन ललितपुर क्षेत्र नं २, विरोध खतिवडा मकवानपुर क्षेत्र नं २, श्रीनाथ बराल कास्की क्षेत्र नं २, रामकुमारी झाँक्री गुल्मी क्षेत्र नं २, सोमप्रसाद पाण्डे पाल्पा क्षेत्र नं २, राजु गुरुङ रुपन्देही क्षेत्र नं २, मेटमणि चौधरी दाङ क्षेत्र नं १, प्रकाश ज्वाला सल्यान, धनबहादुर बुढा डोल्पा, अम्बर थापा दैलेख क्षेत्र नं १, भानुभक्त जोशी बझाङ र प्रेमबहादुर आलेले डोटीबाट उम्मेदवारी दिने भएका छन्।
प्रदेशसभा सदस्यका उम्मेदवारको छनोटका लागि गृहकार्य गरिरहेको सो पार्टीले जनाएको छ । पार्टीले दुवै सभाका समानुपातिक उम्मेदवारको नाम भने निर्वाचन आयोगमा बुझाइसकेको छ ।
प्रकाशित मिति २०७९ असोज २२ गते शनिवार ०३:२८
