यात्रु बिचल्लीमा पार्ने नेपाल एयरलाइन्सका ‘सन्की पाइलट’लाई मन्त्रालयले सोध्यो स्पष्टीकरण

काठमाडौं -:  गन्तव्यमा नपुर्याएर बीच बाटोमै यात्रुहरुलाई बिचल्ली बनाउने नेपाल एयरलाइन्सका ‘सन्की पाइलट’ लाई संस्कृति, पर्यटन तथा नागरिक उड्डयन मन्त्रालयले स्पष्टीकरण सोधेको छ ।

सोमबार काठमाडौंबाट रुकुमका लागि उडेकाे जहाजलाई आफ्नो ड्युटी समय सकिएको भन्दै नेपालगन्जमा यात्रुहरुलाई ओरालेर बिचल्लीमा पार्ने पाइलट पेम्बा शेर्पालाई  मंगलबार मन्त्रालयले स्पष्टीकरण सोधेको छ ।

एअरलाइन्सको ट्वीनअटर जहाज पाइलट पेम्बा शेर्पाले चलाएका थिए । यात्रुहरुले पाइलटको सनकले आफूहरु बिचल्लीमा परेको भन्दै गुनासो गरेपछि पर्यटनमन्त्री मन्त्री प्रेमबहादुर आलेको निर्देशनमा पाइलट शेर्पालाई स्पष्टीकरण सोधिएको बताइएको छ।

मन्त्री आलेले पाइलट शेर्पाबाट चित्तबुझ्दो जवाफ नआए कारबाही गर्ने र कुनै पनि व्यक्तिले गैरजिम्मेवार भएर यात्रु अलपत्र पार्ने काम गरे तुरुन्तै कारबाहीको भागिदार हुनुपर्ने भनेका छन् ।

एयरलाइन्सले भने पाइलट शेर्पाको बचाउ गर्दै पाइलट शेर्पाको ड्युटी बेलुका ४ बजेसम्म मात्रै र सोमबार मौसम प्रतिकूल भएकाले जहाज गन्तव्य नपुगेको भनेको छ ।काठमाडौंबाट सोमबार रुकुमका लागि उडेको जहाज मंगलबार बिहान गन्तव्यमा पुगेको छ ।