इन्डक्सन चुलोको प्रयोग गरी एल.पी ग्याँसको खपतलाई निरुत्साहित गर्न हुँदैन : अध्यक्ष मल्ली

काठमाडौं, पुष -: नेपाल एल.पी ग्याँस उद्योग संघका अध्यक्ष कुलप्रसाद मल्लीले नेपालमा तत्कालै एल.पी ग्याँसको खपतलाई निरुत्साहित गर्न नहुने बताउनुभएको छ ।

संघले काठमाडौंमा २२ औं स्थापना दिवसका अवसरमा गरेको कार्यक्रममा अध्यक्ष मल्लीले सरकारले नै विभिन्न इन्डक्सन चुलोको प्रयोग गरी एल.पी ग्याँसको खपतलाई निरुत्साहित गर्न नसक्ने बताउनुभएको हो ।

अध्यक्ष मल्लीले जलविद्युत नेपालको विकासको मूल ऊर्जा भएकोमा कुनै दुविधा नभएको बताउनुभयो । उहाँले उत्पादन भएको विद्युतको खपत बढाउनुपर्छ तर, विद्युतीय प्रयोग गर्ने उचित पूर्वाधारको विकास नगरी सरकार आफैले जनतालाई भ्रम फैलाएर अलमलमा पार्न नहुने बताउनुभयो । अध्यक्ष मल्लीले ग्याँस उद्योगलाई बचाउन जरुरी रहेको पनि बताउनुभयो ।

कार्यक्रममा नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले नेपाल आयल निगम घाटामा गएकाले अब पेट्रोलियम पदार्थ तथा ग्याँस आयात गर्न निजी क्षेत्रलाई पनि दिनु पर्ने बताउनु भयो । उहाँले नीजी क्षेत्रलाई पनि आयात गर्ने उचित कानुनको व्यवस्था सरकारले गर्नु पर्ने बताउनुभयो ।

सरकारले नीजी क्षेत्रलाई पनि आयात गर्नु दिए ग्याँस तथा इन्धनको मूल्य बजारले नै निर्धारण गर्ने उहाँको भनाइ छ ।सरकारले निजीक्षेत्र मैत्री नीति बनाउँदा मात्रै बजारले गति लिन सक्ने पनि ढकालले बताउनुभयो ।